UKA 2001/15

 

A l l a n n g u u t i s s a t u t s i u n n e r s u u t

 

uunga

 

Feriarneq pillugu Inatsisartut inatsisissaattut siunnersuut

 

Aappassaaneerinninnermut Naalakkersuisunit saqqummiunneqartoq.

 

§ 4-mut

1. § 4, imm. 1-imi oqaaseqatigiit kingulliit ima oqaasertaqassapput:
"Akunnerit feriarfiit amerlanerpaamik 200-it pissarsiarineqarsinnaapput, sapaatit akunnerinut suliffinnut tallimanut imaluunniit sapaatip akunneranut ulluni tallimani suliffiusartumi ullunut suliffinnut 25-nut naapertuuttut."

2. § 4, imm. 2 ima oqaasertaqassaaq:
"Imm. 2. Feriarnerup sivisussusissaanik naatsorsuinermi sulisimanertut naatsorsuutigineqassapput; inatsit una malillugu feriarneq aamma napparsimanermik, erninermik, qitornavissiartaarnermik imaluunniit ajoqusersimanermik pissuteqartumik sulinngittarsimaneq § 14 naapertorlugu feriarnersiutisiffiusussaq."

 

§ 6-imut

3. § 6, imm. 1 ima oqaasertaqassaaq:
"Feriartoqassaaq ukiup katersiviusup kingornatigut ukiumi feriarfimmi tulliuttumi, 1. februaarimit 31. januaarimut ingerlasumi."

 

§ 7-imut

4. § 7 ima oqaasertaqassaaq:
"§ 7. Akissaateqarluni sulisuusoq sivikinnerpaamik sap. akunnerini pingasuni ataqatigiimmik feriarsinnaatitaavoq - feriatut pingaarnertut taaneqartumik - piffissami feriarfiusussami 1. februaarimit 30. septembarimut. Sinneruttut piffissap feriarfissap avataani sivikinnerpaamik sapaatit akunneranni ataatsimi ataqatigiimmmik feriarfigineqassasut piumasaqaatigineqarsinnaapput. Nalunaaquttap akunneri feriarfissat sinneruttut nalunaaquttap akunnerisut ataasiakkaatut feriarfigitinneqarsinnaapput, taamaattoq minnerpaamik ullukkaartutut annertussusilerlugit.
Imm. 2. Ataatsimoortumik isumaqatigiissuteqarnikkut allamik isumaqatigiissuteqartoqarsimanngippat, imaluunniit inatsit isumaqatigiissulluunniit atuuttoq malillugu soraarnissamik ilimasaarinissaq qaammatinit pingasunit sivisuneruppat, sulisitsisup sulisoq akuersiseqqaarnagu, imm. 1 naapertorlugu feria pingaarneq piffissamut sulisitsisup soraarsitsinissamik nalunaarutigisaata piffissallu soraarfissap akornannut inississinnaanngilaa. Sulisitsisup tungaaniit soraarsitsisoqartillugu taassuma tamatigut feriarnissat allat piffissami soraarnissap tungaanoortumi atorneqassasut piumasaqaatigisinnaavaa.
Imm. 3. Akissaateqarluni sulisuusoq piffissami soraarnissap tungaanoortumi suliunnaarsitaasimappat, feriarfissat tamarmik tiguneqarsimasutut isigineqassapput, feriarnissap aalajangereerneqarsimanera apeqqutaatinnagu, piffissat § 9, imm. 1-imi taaneqartut feriarnerlu piffissap suliunnaarsitsiffiup iluaniissinnaappata."

 

§ 8-mut

5. § 8 ima oqaasertaqassaaq:
"§ 8. Pisariaqarpat, suliffeqarfiup ingerlanneqarnera eqqarsaatigalugu, sulisitsisup feria pingaarneq piffissap feriarfissap avataanut inississinnaavaa.
Imm. 2. Imm. 1 malillugu feriamik pingaarnermik inissiisoqarpat feriap pingaarnerup taassumaluunniit ilaata piffissap feriarfiusussap avataanut inissinneqartup 1/5-ianik feria sivitsorneqarsinnaatitaavoq. Ilassutaasunik feriarnermi pisarnertut akissarsiaqartitsisoqassaaq."

 

§ 11-mut

6. § 11, imm. 3 ima oqaasertaqasaaq:
"Imm. 3. Akissaateqarluni sulisuusoq feriarnermini napparsimalersoq, taartisiatut feriarnissaminik pisinnaatitaavoq, napparsimaneq minnerpaamik nalunaaquttap akunnerinik feriarfissanik 40-nik sivisussuseqarsimappat, tamannalu sulisitsisumut Peqqinnissaqarfimmit taamatulluunniit oqartussaasumit uppernarsarneqarsimappat."

7. § 11, imm. 4 ima oqaasertaqassaaq:
"Imm. 4. Akissaateqarluni sulisuusup imm. 2 aamma 3 malillugit taartisiatut feriarsinnaatitaaneranut tunngaviussapput nappaat ima pissuseqarsimassasoq napparsimanerup nalaani feriarneq kinguneqassalluni feriarnerup qasuersaarnissamik siunertaa naammassineqarsimasutut isigineqarsinnaanani aamma akissaateqarluni sulisuusup sulisitsisumut napparsimalernerminik peqqissinerminillu nalunaaruteqarsimanissaanut suliffeqartitaanermi maleruagassanik nalinginnaasunik malinnissimanissaa."

 

§ 16-imut

8. § 16, imm. 1, oqaaseqatigiit kingullit ima oqaasertaqassapput:
"Sulisitsisorli akissaateqarluni sulisuusup soraarnerussutisiaqalernissamut aaqqissuussinernut il.il. akiliutaanit feriarnersiuteqartitsissaaq immikkullu ittumik feriarnersiuteqartitsissalluni."

 

§ 18-mut

9. § 18, imm.3 ima oqaaasertaqassaaq:
"Imm. 3. Qaammammusiaqartut akissarsiaqarlutik feriarnissaminnut taarsiullugu feriaqarnersiuteqarnissaminnik toqqaasimasut feriaqarnersiutissaat tunniunneqassapput feriarfigisaq kingoqqutitsiarlugu, peqatigisaanillu akissarsiaat apparneqassallutik piffissamut feriarfiusimasumut naapertuuttumik."

 

§ 19-imut

10. § 19, imm. 1, nr. 2 ima oqaasertaqassaaq:
"2) akissaateqarluni sulisuusoq utoqqalinermi pensionisiaqarsinnaalersimappat suliunnaarsimappallu."

 

§ 22-mut

11. § 22, imm. 3 ima oqaasertaqassaaq:
"Imm. 3. Feriarnersiutinit, immikkut ittumik feriarnersiutinit aamma feriarnermi akissarsianit pisortanut akiligassanik ilanngaassisoqarsinnaanngilaq, inatsisini allani taama allassimasoqartinnagu."

 

§ 23-mut

12. § 23, imm. 2 ima oqaasertaqassaaq:
"Imm. 2. Immikkoortoq 1 atorneqassanngilaq, akissaateqarluni sulisuusoq sulisitsisumut isumaqatigiissuteqarnikkut feriassanik katersisinnaatitaasimappat tamannalu feriarnermut aningaasaateqarfimmut, imm. 3 takuuk, uppernarsarneqarpat."

 

Kapitali 7-imut

13. Kapitali 7 ima oqaasertaqassaaq:

"Kapitali 7
Atuutilerfia

§ 24. Inatsit 1. januar 2002-imit atuutilerpoq, ukiumit katersiviusumit 2001-imit aamma ukiumit feriarfiusumit 1. februar 2002-imi aallartittumit atuutissalluni.
Imm. 2. Aalajangersimanngitsumik suliffeqartitaasut Feriernersiuteqarneq feriernerlu pillugit Inatsisartut inatsisaata atuutinngiffii pillugit Namminersornerullutik Oqartussat nalunaarutaanni nr. 27, 5. august 1991-imeersumi § 1 naqinneq b-imi pineqartut eqqarsaatigalugit aatsaat inatsit atuutilissaaq 1. januar 2003 ukiumit katersiviusumit 2002-imit aamma ukiumit feriarfiusumit 1. februar 2003 aallartittumit sunniuteqartumik.
Imm. 3. Peqatigitillugu atorunnaarsinneqarput Feriernersiuteqarneq feriernerlu pillugit Inatsisartut inatsisaat nr. 22, 25. oktober 1990-imeersoq kiisalu taanna malillugu nalunaarusiarineqarsimasut."

 

 

 

Nassuiaatit

Allannguutissatut siunnersuut saqqummiunneqarpoq inatsisissatut siunnersuutip siullermeerneqarnerani siunnersuutip kalaallisuuani kukkunerit toqqarlugit taaneqartut iluarseqquneqarmata. Inatsisissatut siunnersuutip misissuataaqqinnerani kukkunerit amigaatillu allat aamma naammattorneqarput, taamatullu inatsisissatut siunnersuutip oqaasertaasa ilaanik iluarsiisoqarluni erseqqissaasoqarlunilu inatsisip paasineqarnissaanut iluaqutaasussanik.

 

Nr. 1-imut

Oqaasertaanik erseqqissaaneq tassa pineqarpoq.

 

Nr. 2-mut

Oqaaseqatigiit iluarsineqarput erseqqissarneqarlutillu.

 

Nr. 3-mut

Erseqqissaatitut oqaaseq "ingerlasumi" ilanngunneqarpoq.

 

Nr. 4-mut

Imm. 1-imi inatsisissatut siunnersuutip danskisuuanitut "- feriatut pingaarnertut taaneqartumik -" ilanngunneqarpoq.

Imm. 2-mi kukkuneq killormut isumaqalersitsisoq iluarsineqarpoq.

Imm. 3 danskisuuanut naapertuuttunngortinneqarpoq.

Taakku saniatigut oqaaseqatigiinnik iluarsiisoqarpoq.

 

Nr. 5-imut

§ 7-ip allanngortinneqarnerata malitsigisaanik allanngortitsineruvoq, imm. 2-milu oqaaseqatigiit iluarsineqarlutik.

 

Nr. 6-imut

Erseqqissarneqarpoq feriarnermi napparsimalersimagaanni taartisiatut feriarnissaq pisinnaatitaaffiusoq.

 

Nr. 7-imut

Immikkoortoq danskisuuanut naapertuuttunngortinneqarpoq.

 

Nr. 8-mut nr. 9-mullu

Erseqqissaanerit taakkunani pineqarput.

 

Nr. 10-mut

Allanngortitsinikkut 2) danskisuuanut naapertuuttunngortinneqarpoq.

 

Nr. 11-mut

Immikkoortup naggataatungaani danskisuuanut naapertuuttunngortitsisoqarpoq.

 

Nr. 12-imut

", imm. 3 takuuk," ilanngunneqarpoq.

 

Nr. 13-imut

Imm. 1-imi 2-milu erseqqissaasoqarpoq.